Dei fiktive slektskapsbanda var i større grad eit resultat av
individuelle val. Dette kan peike mot at fostring og mågskapsband i
større grad var eigna som partidannande reiskapar enn frendskapsbanda.
Vert dette reflektert med omsyn til grupperinga av dei stridande grupperingane
i innbyrdesstriden? Fosterfedrar og fosterbrør utgjorde eit viktig
element i den indre krinsen av allierte rundt kongsemna i denne perioden.
Magnus Blinde sin fosterfar var Vidkunn Erlingsson frå Bjarkøy,
ein av lendmennene til Sigurd Jorsalfar. Vi høyrer ikkje om at Vidkunn
deltok direkte i striden mellom Magnus og Harald, men sagaene gjev fleire
indikasjonar på at Vidkunn utgjorde ei god støtte for fosterson
sin. Vinteren 1138/39 søkte Magnus tilflukt hos Vidkunn etter at han og
Sigurd Slembe hadde drepe ein av Inge sine menn.[173]
Vi veit ingenting om Harald Gille og fostringstilhøva i Irland der han
voks opp, men oppveksten til sønene hans peikar mot at Harald var kjent
med fostringstradisjonane. Fostringa av Haraldssønene er nemleg eit godt
døme på kva partidannande effekt slik band kunne ha. Dei tre
sønene til Harald som voks opp innanlands vart alle fostra på
ulike stadar i landet. Inge voks opp i Viken hos Åmunde Gyrdsson, Sigurd
i Trøndelag hos Såda-Gyrd Bårdsson,174
medan Magnus, som døydde medan han enno var liten, vart fostra på
Vestlandet hos Kyrpinge-Orm på Støle i Sunnhordland.[175] Dei tre sønene til kong Harald
Gille vart altså fostra på dei tre politisk mest sentrale stadane i
landet; Trøndelag, Viken og Vestlandet. Den geografiske plasseringa av
kongssønene har truleg vore ein viktig lekk i Harald sitt arbeid for
å tryggje kongedømmet.
Allereie i konflikten mellom Harald og Magnus Blinde ser vi nemleg at
kjeldematerialet fokuserer på kongsemna si tilslutning i ulike regionar.
Magnus og Sigurd Slembe henta støtte frå Trøndelag, medan
Harald stolte på stønad i frå Viken.[176] For Harald var det viktig å sikre seg
støtte i dei områda der han stod svakast, som til dømes
Trøndelag, men ikkje slik at det gjekk ut over tilhøvet til
Viken. Med tre søner kunne han ta omsyn til begge desse interessene.
Harald plasserte såleis medvite sønene sine hos mektige stormenn i
dei tre mest sentrale landsdelene, for dermed å utvide sitt
maktområde og skaffe seg fotfeste i Trøndelag, der fienden stod
sterkast.
Etter at Harald døydde i 1136, ser vi at fosterfedrene til
sønene fekk ein svært sentral plass i dei politiske hendingane.
Tradisjonelt har historieskrivinga framheva dronning Ingrid, mor til kong Inge,
sin innverknad på dei politiske avgjerdene like etter ektemannen sin
død. I fylgje Heimskringla sendte nemleg Ingrid eit raskt skip til
Trondheim med bod om å ta Sigurd til konge der, medan ho sjølv
reiste til Viken til sonen Inge. Så vart begge Haraldssønene tekne
til kongar:
Da de kom til Viken, ble det stevnet Borgarting, og der ble Inge tatt til
konge, da var han på det andre året. Åmunde og Tjostolv
Ålesson og mange andre store høvdinger ble med på dette
vedtaket.
Da disse tidender kom nord til Trondheimen at kong Harald var tatt av dage,
ble Sigurd, sønn til kong Harald, tatt til konge der, og med på
dette vedtaket var Ottar Birting, Peter Sauda-Ulvsson og brødrene
Guttorm Åsolvsson fra Rein og Ottar Balle og mange andre
høvdinger.[177]
Vi ser at fostringsrelasjonane var viktige for danninga av grupperingar eller
flokkar kring kongsemna. Under Haraldssønene ser dessutan fostringbanda
ut til å ha verka inn på ei fastare gruppering av dei stridande
kreftene.
Morkinskinna nemner ikkje at Ingrid sende bod til Trøndelag, berre at
ho sjølv reiste austover.[178]
Fagrskinna nemner ikkje dronning Ingrid i det heile, men legg vekt på at
fosterfedrane til dei to kongssønene var med på å gje dei
kongsnamn.[179] Fagrskinna og Morkinskinna
gjev, i større grad enn Heimskringla, uttrykk for at valet av Sigurd og
Inge skjedde ut frå initiativ frå regionale krefter i respektive
Trøndelag og Viken. Ei slik tolking står likevel ikkje naudsynt i
motsetnad til Heimskringla si fokusering på dronning Ingrid. Kroninga av
Sigurd i Trøndelag og Inge i Viken kan vi tolke som eit kompromiss
mellom to krefter. Vi kan tenkje oss at fostringsbanda verka forsterkande
på allereie eksisterande regionale interesser, slik at kongsemna vart
samlingsmerke for gryande lokalpatriotisme.[180] Dronning Ingrid og hennar rådgjevarar handla
dermed ut i frå eit ynskje om å sameine dei lokale interessene, for
å hindre at Trøndelag utnemnde sin eigen tronkandidat i protest
mot at Inge vart teken til konge.
Kompromisset evna likevel ikkje å viske ut motsetnadstilhøvet
mellom dei to fraksjonane fullstendig. I dei fyrste åra av
Haraldssønene si regjeringstid heldt Sigurd og Inge felles hird, men det
er tydeleg at dei gjerne opptrådte på kvar sin kant, og gjerne
saman med fosterfedrane sine. Inge var saman med Åmunde Gyrdsson,
fosterfar sin, og Tjostolv Ålesson, ein lendmann frå Viken, i eit
slag mot Karl jarl og Magnus Blinde i 1137.[181] Morkinskinna og Fagrskinna fortel dessutan at Inge
låg ved Hornborusunda same år og venta på danskekongen Erik
Emune som kom sørfrå saman med kong Magnus og Sigurd Slembe. Saman
med Inge var "fosterfar hans, Åmunde son til Gyrd, son til
Logberseson".[182] To år seinare var
Åmunde med i slaget ved Holmengrå, der Magnus Blinde fall og Sigurd
Slembe vart teken til fange og drepen.[183]
Det er uvisst om Såda-Gyrd Bårdsson tok like aktivt del i
innbyrdesstriden som fosterfar til Inge. Heimskringla nemner at Sigurd og Gyrd
sendte ut folk for å leite etter Sigurd Slembe i 1139, men det er tvilsom
om dette er korrekt.[184] Det er likevel
liten tvil om at Såda-Gyrd var ein av hovudmennene bak grupperinga kring
Sigurd. Både han og Åmunde vert nemnde fyrst i samtlege av
kjeldene, i ein omtale av tilhøvet mellom Inge og Sigurd då dei
var born.[185]
Motsetnadane mellom grupperingane kring kongssønene og fosterfedrene
deira kjem til uttrykk gjennom ei brevsending mellom kongane i 1139. I dette
brevet retta kong Inge, saman med vikveringane og bergensmennene,
klagemål mot Sigurd og venene hans i Trøndelag for at dei sat
rolege der nord, medan Inge hadde alt strevet med å verje Viken mot
Sigurd Slembe og Magnus. Brevet uttrykkjer tydeleg ei todeling i grupperinga
kring kongssønene, og ein viss fiendskap mellom fraksjonane:
Nå synes jeg [Inge] og mine venner at vi har de vanskeligheter og den
nød som gjelder oss begge, nærmere på livet enn du og dine
venner. Gjør nå du så vel at du farer til meg så snart
og så mannsterk som du kan, og la oss to være sammen, hva det
så hender. Nå er han vår beste venn, som rår til at vi
er så godt forlikte som mulig og alltid holder sammen i alle måter.
Men dersom du drar deg unna, og enda jeg ber deg inntrengende, lar være
å komme som du før har gjort, da kan du vente deg at jeg vil fare
imot deg med en hær, og så får Gud skifte mellom oss. For
ikke kan vi lenger ha det så at vi sitter med stor kostnad og mye
mannskap som trengs for ufreden, men du tar halvparten av all landskyld og
andre inntekter i Norge. Lev i Guds fred.[186]
Det var Ottar Birting, ein lendmann frå Trondheim,[187] som tok til orde for kong Sigurd. Han takka fyrst kong
Inge og mennene hans for alt strevet dei hadde hatt med landevernet. Deretter
vendte Ottar seg til Sigurd med bøn om at han skulle fare så
mannsterk og fort som han kunne til bror sin Inge, dermed skulle "den ene
hjelpe den andre i alt som det er nytte i".[188] Dette vart løysinga og Sigurd og Inge slo sine
stridskrefter saman for å få bukt med Sigurd Slembe og Magnus
Blinde.
Det tilsynelatande fredlege tilhøvet mellom dei to brørne i dei
fylgjande åra, hadde Ottar truleg mykje av æra for. Omlag
samstundes med at dei to grupperingane kring kongssønene vart samde om
å yte felles innsats mot fienden gifta Ottar Birting seg med dronning
Ingrid, enka etter Harald Gille og mor til kong Inge.[189] Sagaene opplyser at Ottar "var en sterk støtte
for kong Inge så lenge han var barn".[190] Ottar var samstundes ein av stormennene som hadde gjeve
kongsnamn til kong Sigurd, og som ein mektig hovding frå Trøndelag
kan vi rekne med at sambandet mellom Ottar og grupperinga kring Sigurd var
sterk. Ottar si mekling mellom kongssønene under brevvekslinga og
ekteskapet med dronning Ingrid gjev grunnlag for å tru at Ottar var ein
brubyggjar mellom dei to fraksjonane. Då Ottar vart drepen i 1145[191] vart samarbeidet mellom
Haraldssønene brote, og dermed var det duka for full strid mellom dei.
Fostringsbanda var ein reiskap for Harald i arbeidet med å få eit
fastare grep om riksstyringa, men i neste omgang førte dette til at
kongsemna vart sett på som uttrykk for regionale interesser og
lokalpatriotisme. Desse interessene vart halde i sjakk ved hjelp av Ottar
Birting si sentrale meklarrolle medan Haraldssønene var unge, men
då han var død blussa dei regionale kreftene opp på ny og
konflikten mellom fraksjonane gav næring til eit motsetnadstilhøve
mellom regionane. Dette motsetnadstilhøvet vart styrkt gjennom kampane
mellom Haraldssønene, og ikkje minst gjennom Erlings Skakke sine
nådelause framstøyt mot opposisjonelle krefter mot slutten av Inge
si regjeringstid og under Magnus Erlingsson på 1160- og 1170-talet. I
heile denne prosessen verka fostringstilhøvet som ein katalysator for
andre splittande krefter.
I kapittel 2 vart det peika på at mågskapen hadde mange fellestrekk
med venskapen. Ekteskapet kunne nok vere ei stadfesting av to personar sin
hugleik til kvarandre, men var like fullt ein kontrakt som batt to familiar
saman. Ekteskapet hadde såleis potensiale som ein effektiv reiskap til
å etablere politiske alliansar. Korleis nytta partileiarane
mågskapen til å skaffe seg allierte i maktkampen mellom kongsemna,
og var mågskapstilhøva ein viktig faktor i danninga av dei ulike
politiske grupperingane i fyrste fasen av innbyrdesstriden?
Magnus Blinde sitt ekteskap med den danske kongsdottera Kristin viser den
politiske verknaden av mågskapsalliansar i innbyrdesstriden. I fylgje
Saxo sendte Magnus eit sendebod til kong Erik Emune i Danmark med
førespurnad om å få brordottera hans, Kristin, til ekte.[192] Erik tok godt i mot tilbodet, og Saxo
skildrar motivet til Erik på denne måten:
Her kom der Sendemænd til ham fra Kong Magnus i Norge for paa hans Vegne
at bejle til Knuds ældste Datter, skjønt hun endnu ikke var
mandvoxen. Erik tog i Haab om, at det atter kunde hjælpe ham til
Kræfter, fra sine Naboer, naar han gav sig i Svogerskab med dem, og da
han selv endnu var ugift, eftersom Krigen ingen Tid havde levnet ham til at
tænke paa sligt, tog han med Magnus' Samtykke hans Stifmoder, der havde
været Dronning i Norge, til Ægte, idet den norske Konge fandt ham
fuldt værdig til et saadant dobbelt Svogerskab.[193]
Kong Erik Emune var i denne tida involvert i den danske innbyrdesstriden, og
som Saxo påpeikar, kunne støtte frå "naboene" hjelpe han til
krefter. Magnus på si side trengte støtte mot Harald Gille, og ein
allianse med danskekongen kunne avgjere striden mellom dei.
Mågskapssambandet med Erik skulle vise seg å få store
konsekvensar for Magnus, men diverre ikkje til hans fordel. I fylgje
Heimskringla oppstod det uvenskap mellom Magnus og Erik av di Magnus ikkje
elska Kristin lenger, og sendte ho attende til frendane sine i Danmark.
"[S]iden gikk alt tyngre for ham. Hennes frender viste ham stor uvilje".[194]Saxo, derimot, har eit anna syn
på årsaka til uvenskapen mellom Magnus og Erik. I fylgje den danske
krønike gjekk Magnus bak ryggen på Erik ved å planleggje eit
komplott mot mågen sin, saman med kong Nils, som sidan 1131 hadde vore
Erik sin bitre fiende.[195] Nils var son til
Svein Ulvsson, og farbror til Erik Emune.[196] Magnus skal ha fått ein større pengesum av
Nils for å ta livet av Erik. Planane lukkast ikkje av di Kristin
åtvara Erik om Magnus sine planar. Som fylgje av Kristin sitt svik skilte
Magnus seg frå kona si, og sendte henne heim til Danmark "for at
tilføje hende [og frendane hennar] en Forhåaanelse".[197]
Det er tydeleg at konflikten mellom dei to mågane stakk djupt.
Mågskapen innebar ein lovnad om lojalitet som Magnus hadde brote.
Lovnadsbrotet hadde øydelagt venskapen mellom dei to, og Magnus "blev nu
fra Eriks Gjæsteven forvandlet til hans Fjende".[198] Erik viste denne fiendskapen gjennom å alliere
seg med Magnus sin fiende Harald Gille:
Ved samme Tid[199] begav Harald
Irlænder, da han var bleven fordrevet fra Norge, sig til Danmark for at
søge Hjælp hos Erik. Denne tog godt imod ham, fordi hans Medbejler
havde forskudt sin Hustru, og i sin Glæde over det ypperlige Paaskud, han
nu havde, til at give sig i Strid med Magnus, besluttede han at yde Harald
Hjælp.[200]
Konkret innebar denne hjelpa at Harald fekk med seg ein større
hærstyrke attende til Noreg, og saman med mannskapet han samla her heime,
utgjorde dette ein stor hærstyrke. I fylgje tradisjonen skal dette vere
grunnen til at denne tida vart kalla múgavetr, eller
"folkemengde-vinteren". [201] For
Magnus fekk dette alvorleg følgjer, ettersom hæren til Harald
overmanna Magnusmennene i Bergen og tok kongen til fange.[202]
Mågskapen med Erik Emune fekk altså fatale følgjer for
Magnus. Ved å bryte tilliten til Erik signaliserte han fiendskap og
gjorde ein allianse mellom Erik og Harald mogeleg. Dette illustrerer
lojalitetsaspektet ved mågskapen og innverknaden av dei personlege banda,
og misleghaldet av desse, på partikonstellasjonane.
Like viktige som internordiske ekteskaplege alliansar var
mågskapsrelasjonane mellom kongsemna og mennene deira. Som tidlegare
nemnt gjekk mange av mennene til Sigurd og Øystein over til Inge etter
at Sigurd fall i 1155.[203]
Ordvalet i kjeldene skulle tyde på at vi her har å gjere med
ein avtale som vart inngått mellom Inge og overløparane. Samtlege
av sagaene som omhandlar denne episoden, nyttar den norrøne nemninga
spenja som tyder å lokke eller lure.[204] "Kong Inge og Gregorius lokket mange menn frå
kong Øystein".[205] Mykje tyder
på at det var ekteskaplege alliansar kong Inge lokka med i dette
høvet. Tre av dei fire namngjevne mennene som gav seg inn under Inge og
Gregorius i 1155, vart nemleg gifte med frenker av anten Inge eller Gregorius.
Halldor Brynjolvsson fekk Sigrid Dagsdotter, ei syster av Gregorius. Simon
Skalp og Jon Hallkjellsson, begge søner til Hallkjell Huk, vart gifte
med kvar si syster av kong Inge, døtrer av Harald Gille.[206] Sagaene opplyser ikkje eksplisitt at det var ein
samanhang mellom partibytet og inngåinga av ekteskap, men det er all
grunn til å tru at dette har vore eit viktig verkemiddel i alliansen.
Vi har ovanfor sett at mågskapen var ein viktig reiskap til å
skaffe støtte både innbyrdes mellom dei nordiske kongefamiliane og
mellom kongsemna og mennene deira. Samstundes har vi fått klare
indikasjonar på at lojalitet mellom mågar vart verdsett
høgt, i visse høve høgare enn frendskap.
Msk 425, Fsk 349, Hkr 575, Hkr: NKS
288.
174 Hkr: NKS 283.
[175] Hkr: NKS 295.
[176] Hkr: NKS 269-270.
[177] Hkr 570, Hkr: NKS 283.
[178] Msk 414.
[179] Fsk 347-348.
[180] Gathorne-Hardy 1956: 9, 12, 30 ff.
[181] Hkr 572, Hkr: NKS 284, Msk 417.
[182] Msk 418: "Amvndi fostri hans
Gyrþar s. Laugbersa s", Fsk 348.
[183] Hkr 579, Hkr: NKS 292.
[184] Hkr 575-576, Hkr: NKS 288. Kjeldene
samstemmer ikkje med omsyn til denne hendinga. Fsk hevdar at det var Inge og
fosterfaren Åmunde som sendte folk etter Sigurd Slembe i 1139. Msk har
ein tredje versjon der det heiter at Inge og fosterfaren Gyrd stod bak
tilburden. I alle tre kjeldene står denne hendinga i relasjon til ei
brevsending mellom kongssønene same år. I fylgje tradisjonen sende
Inge brev til broren med klage om at Sigurd og mennene hans ikkje
føretok seg noko mot Magnus og Sigurd Slembe. Innhaldet i brevet skulle
tyde på at det var Inge og fosterfaren Åmunde som gav ordren om
å finne Sigurd Slembe, og ikkje kong Sigurd og Såda-Gyrd, slik Hkr
framstiller det.
[185] Hkr 585, Hkr: NKS 299-300, Fsk 351,
Msk 445.
[186] Hkr 576-577, Hkr: NKS 289-290.
[187] Storm 1884: 147-148.
[188] Hkr 577, Hkr: NKS 290, Msk 430.
[189] Dette ekteskapet vart truleg
inngått i 1140, Storm 1884: 147-148.
[190] Hkr 581, Hkr: NKS 295, Msk 439.
[191] Msk 439, Hkr 581, Hkr: NKS 295.
Datering etter Storm 1884: 147.
[192] Kristin var dotter til Knut Lavard,
jmf. vedlegg fig. 3.
[193] Saxo 2: 78.
[194] Hkr 555-556, Hkr: NKS 265.
[195] Skovgaard-Petersen et al. 1977:
281.
[196] Jmf. vedlegg fig. 3.
[197] Saxo 2: 82-84.
[198] Saxo 2: 82.
[199] I fylgje Hkr: NKS 267-268 skal dette
ha funne stad ut på hausten i 1134.
[200] Saxo 2: 90.
[201] Hkr: 559, Hkr: NKS 270
[202] Saxo 2: 92, Hkr 560-561, Hkr: NKS
270-271.
[203] Jmf s.[.
204] Fritzner 1954.
[205] Hkr 593, Hkr: NKS 308, Fsk 356, Msk
460.
[206] Jmf. vedlegg fig. 1 og fig. 12.