I
I Historisk Tidsskrift nr. 1 1980 har Kåre Lunden ei melding av
Norsk økonomisk historie 1500-1970, første bandet 1500-1850.
Då bokmeldinga etter eit par sider får eit vidare siktemål,
må det vera meg tillate å koma med nokre snøgge merknader.
Lundens kritikk av Norsk økonomisk historie
er dobbel. For det første hevdar han at ei lærebok på
grunnfagsnivå ideelt sett bør formidla ei totalforståing
av samfunnet og samfunnsutviklinga, og derfor ikkje avgrensa seg så
sterkt til ein viss sektor som denne. Mitt syn på dette er at heilskapsinteressene
også kan ivaretakast på pensumnivå, ved ei gjennomtenkt
samanstilling av bøker og artiklar. Eg meiner såleis
uforstyrra at det er rom for bøker av denne typen. Lundens andre
kommentar går djupare: Han ser Norsk økonomisk historie som
enda eit produkt av ein forskningstradisjon som etter kvart har vorte temmeleg
einerådande i mellomperioden 1500 1800, og han set seg derfor føre
å rissa opp ei alternativ tolkning av norsk historie i dette tidsrommet.
Frå min synsstad er det gledeleg at læreboka
får eit slikt motstykke i kompakt form. Men fortener freistnaden
all nyhendeglansen? Det Lunden gjer, er å ta velkjende marxistisk
inspirerte oppfatningar om europeisk historie i overgangen fra føydalisme
til kapitalisme og prøva å visa at dei høver også
på norske tilhøve. Vi som skreiv læreboka, valde å
halda dei importerte modellane eit grann på fråstand, og fann
da at den norske utviklinga hadde fleire viktige særdrag.
No vert det i båe tilfella tale om jamføring
mellom vårt land og resten av Europa. Det burde vera ein fruktbar
framgangsmåte, men etter å ha lese Lundens innlegg slår
det meg kor vanskeleg det er å semjast om kva som var den europeiske
utviklinga. Som einskildpersonar kan vi vel ikkje nå å lesa
alt, og skil kanskje ikkje likt mellom primær- og sekundærlitteratur.
Eg har no lært ein god del av Lunden, på same tid som eg trur
han tek i miss på einskilde stader, særleg i tolkinga av vekstmønsteret
i England og Holland. Så kanskje var jamføringsopplegget vårt
i læreboka for ærgjerrig, og burde vore avgrensa til f.eks.
Danmark åleine.
Nåvel, det er nett på dette punktet
Lunden set inn frontalåtaket sitt. Han vil ikkje godta at Norge slapp
lettare unna skattar og pålegg enn moderlandet, særleg ikkje
når betalingsevna tel med. Det er i argumentasjonen her eg meiner
han har svikt som må påpeikast.
Alt i boka har eg stilt spørsmålsteikn
ved truverdet av skatteoppgåvene frå 1600-talet. Det siste
ordet er ikkje sagt, og for alt eg veit, kan det neste gå i favør
av Lundens syn. Men eg skjønar ikkje at hans eige forsøk
på oppretting kan ha noko for seg. På sidene 94-96 i meldinga
talar han for at dei oppgjevne norske statsinntektene på 506 000
rd. (årleg gjennomsnitt for 1661-75) må aukast til over 900
000 for å verta samanliknelege med dei danske på 854 000. Den
store plussposten er dei uregistrerte overføringane frå legdene
til den norske hæren, ein sum på 367 660 rd. etter Lundens
reknemåte. No er vi samde om at i hovudsak var den danske hæren
verva, med ståande avdelingar av yrkesmilitære, medan den norske
var utskriven.
Det inneber at dei norske soldatane var sysselsette i sivile yrke i
fredstid, og at legdene då berre betalte for vedlikehald av utstyr
og for kosten i nokre få eksisdagar årleg. Lundens store tillegg
er såleis berre gyldig for eit tilstand med full mobilisering under
krig. Talet på slike år på 1600- og 1700-talet skulle
la seg rekna ut, og det vert ikkje stort i høve til fredsåra.
Eg ser difor heller ingen grunn til endra på konklusjonane i læreboka.
Så var det vala av døme: Dersom Lunden
vil argumentera mot ein påstand om mindre skattebør for nordmennene
i visse tidsrom på 1600-talet, eller allment i heile foreningstida,
vert det misvisande å køyra fram Gudbrandsdalen i 1657-58.
Det er det svartaste tidspunktet i dansk norsk historie, Danmark er redusert
til København og midlane til å berga riket må hentast
i Norge og i form av utanlandske lån. Det same Iyt seiast om prestane
i Lom og Vågå. Alminneleg skjøn burde straks peika dei
ut som atypiske, og reint statistisk er dei i alle høve null verde
mot den store flokken av prestar som dukkar opp i kjeldene eit godt hundreår
seinare og viser økonomiske kår av eit anna slag. Endeleg
vil eg åtvara mot bruken av NRF-kyr i omrekninga frå dalar
til kroner. Lunden kunne i det minste prøva ei parallell omrekning
bygd på kornverdi - vel å merka i kornverdi i normalår.
Det er under lesinga av desse lite vellukka omrekningane
at ein kjenner Iyst til å gi opp totaloverslaga og heller studera
skattebøra på grasrotnivå. Lunden stoggar rett nok hjå
sorenskrivaren. Hans Arentz fortel om pengeskort og simple levekår
i Sunnfiord, men eg må tilstå at eg ser heilt andre motiv og
tolkingar i denne framstlllinga enn Lunden. Bl.a. meiner eg å skjøna
det som Lunden må avvisa, at sunnfjordingane kunne betala ekstraskatten
«med velvilje» samstundes som det gjekk trått med dei
ordinære skattane. Nei, med grasrotniva tenkjer eg på den einskilde
bonden. Kunne vi klara å setja opp reknestykket hans, med inntekter
av gardsdrift og attåtnæringar og utlegg til levemåten,
løner, investeringar og skatt ville vi få det grepet på
betalingsevne og formelt og reelt skattetrykk som vi saknar no. Ei liknande
etterrøking på dansk side skulle vera mogeleg og opna for
ei meir talande jamføring.
Likevel - trass i desse innvendingane er eg glad
for at Lunden tok steget ut over bokmeldinga og la meiningane sine fram
i så konsis form. Med eit lite korn av ironi kan eg sela at han har
gjort det meir spennande å bruka Norsk økonomisk historie
i undervisninga. Han har påvist at vi som skreiv boka burde stilt
oss fleire spørsmål, drøfta del meir eksplisitt, og
gjeve stoffet fleire kontaktpunkt med den politiske delen av samfunnslivet.
Men det heilskapssynet Lunden vil formidla, tykkjer eg enno saknar overtydingskraft.
Ståle Dvrvik
II
I sin artikkel etterlyser Kåre Lunden «verkeleg forståing»
ut frå ein «konsistent teori».(1) Dette finst ikkje i
den boka han omtaler, men Lunden sjølv har både teori og forståing.
Til dette er å seie: For det fyrste er boka lagt opp som ei økonomisk
historie, med sterke innslag av sosialhistorie i dette bandet. Ålmenne
Noregssoger har vi frå før. For det andre: «A little
knowledge is a dangerous thing» - evna til forståing og karakterisering
av historia er hos mange større di mindre kunnskapen er. Lunden
vil presse perioden 1500-1850 inn i eit enkelt marxistisk utviklingsskjema.
l beste fall er dette irrelevant og ufruktbart, men det vil og vere ei
hindring for innsyn i det sermerkte ved norsk historie. Det burde vere
målet for historiestudiet, ikkje å møte kjende marxistiske
merkelappar.(2)
Det vil ikkje kome noko ut av eit ordskifte om dette
temaet. Derimot burde det prinsipielt vere råd å kome fram
til resultatet ved å diskutere på eit «lågare»
nivå, dei «hovudpunkt» som Lunden har valt å kritisere.
Sagbruksdrift og skogeigedom står sentralt
i det andre hovudpunktet hos Lunden. Han understreker at privilega av 1662
og 1688 «illustrerer skulepedagogisk» overgangsperioden mellom
«føydalisme» og kapitalisme. (KL 106). Det han skriv
illustrerer i alle høve at det skorter på kunnskap og resonnement.(3)
1) Han skriv om «borgarprivilegia» av 1662 og 1688 (KL 104,
105), men 1688 var ikkje eit borgarprivilegium. Det var ikkje sett forbod
mot at bønder og embetsmenn åtte priviligerte sagbruk. I åraksis
gjekk heller ikkje dei lokale sagkommisjonane inn for diskriminering av
bøndene (derimot ser det ut til at prestane måtte
slutte som sageigarar). T.d. hadde bøndene i Follo 36 % av den priviligerte
skurden, omlag det same som før.(4)
I Follo var det berre små flaumsager, i dei
store sagbruksområda var eigedomsstrukturen annleis. 2) Lunden skriv:
«Bøndene hadde ikkje hatt problem så langt» (til
1688). Det ser ut til at han meiner at nedskjeringa frå 6.4 til 3.4
mill. bord gjekk stort sett ut over bøndene. Han vil ikkje vere
med på at bøndene var på veg ut av næringa før
1688, og harsellerer over at dei skulle ha «vanskar» (KL 105,
hans hermeteikn). Borgarane hadde ikkje «skuggen av sjanse»
til å konkurrere med bøndene før privilega kom. Til
dette er det berre å vise til klare fakta: Jamvel i Follo hadde borgarane
2/5 av skurden før 1688, men i det sentrale sagbruksområdet
Nedre Romerike sat dei med 9/10. Lunden vil kan hende hevde at byprivilega
av 1662 hadde ført til ein overgang. Men 1661 hadde bøndene
berre 1/10 av sagbruka i Trøndelag, og ved 1650 var alle sagbruka
i Skiensdistriktet på borgarhand.(5) Storparten av reduksjonen gjekk
ut over borgarane. I den mun vi kan sjå på sakbruksprivilega
som middel i ein gruppestrid, blir det tale om ein strid innan borgarskapet,
ikkje mellom borgar og bonde.(6)
Det må såleis vere ein avgjerande svikt
i Lunden si tankerekke. (3) Han hevdar at utkonkurreringa av bøndene
berre er ein «påstand», og dette»neglisjerer grunntilhøva
ved bondeøkonomien den gongen» . Eg kan snu dette til at Lunden
neglisjerer grunntilhøva ved skogbruksøkonomien (sjå
t.d. NØH 46 og tilvist litteratur). Lunden peikar på at alternativkostnaden
for bondens arbeidskraft var låg i sesongen for skogsdrift og sagskurd.
(Rett nok, men det er ei sterk overdriving å seie at han var «nær
null».) For sjølve skogsdrifta er dette likevel irrelevant,
her er det spørsmål om bonden som sageigar. Lunden skriv om
bonden som skar tømmer frå eigen skog. Men ved 1660 var det
berre ein ørliten part av norsk bordeksport som kom frå sagbruk
av denne typen, framfor alt var det få slike på Austlandet
og Agder der sagbruksprivilega kom. Tyngda av sagtømmeret kom då
frå dei øvre bygdene. Denne drifta var sers kapitalkrevjande,
her kunne ein vanleg bonde ikkje fylgje med. Men kvifor kunne ikkje bøndene
halde oppe drifta på dei sagbruka dei sat med frå før?
For det fyrste blei skogen uthoggen, det blei knapt om sagtømmer
i dei ytste bygdene. Mange av dei små sagbruka var alt nedlagde før
1688. Viktigare var det at laglege og gode sagfossar var eit knapt gode.
Det svarte seg då for bonden å selje sag og foss til ein borgar
som kunne nytte kapasiteten fullt ut.
Lunden hevder at borgarane måtte få
føremuner med politiske middel, sidan «dei ikkje klarte konkurransen
(med bøndene) reint økonomisk.» Dette blei «på
den mest overtydande måten stadfesta seinare», ved den frie
handsaginga frå 1795. 4) Han går ikkje inn på mi framstilling
av handsaginga som unntaksfenomen aktuelt i somme område. (NØH
164). Det var ikkje tale om at bøndene alment gjekk over til handsaging.
Visse stader kunne dei konkurrere med dei priviligerte sagene, m.a. ved
at kapitalinnsatsen var nær null, og transportkostnadene blei lågare.
Lat dette marginale fenomenet liggje, eg kan heller fylgje Lunden ved å
sja på kva som hende litt seinare. 1818 fekk alle bønder rett
til å skjere for eksport frå eigen skog Det førde ikkje
til at borgarane blei tevla ut, bondesagbruka hadde så godt som inkje
å seie i eksporten seinare.
Trelasthandel og sagbruksdrift var ei sers kapitalkrevjande
næring før både 1662 og 1688. Men sagbruksprivilega
førde med seg at inngangsbiletten til næringa blei enda høgare.
Bøndene var ute av dansen frå før, privilega førde
med seg at det blei vanskelegare for nye borgarar å arbeide seg inn.
Privilega kunne ha ein oligopoliserandeeffekt.Og det kunne slå negativt
ut for bøndene (NØH167,213). 5) I seg sjølv ville
Ikkje einerett for borgarane til trelasthandel og sagbruksdrift føre
til ein monopolvinst, slik Lunden meiner. Det spørs kor langt dei
greidde å stå saman når det galdt prisar og leveringsvilkår.
I praksis skifte dette både over tid og frå vassdrag til vassdrag.
Lunden går så langt at han hevder borgarane
greidde å ta frå bøndene kapitalverdet av skogen «eller
det meste av den», ved hjelp av privilega frå 1662 og 1688.
Det skjedde ved at dei hadde «full hand om prisfastsettinga»,
prisen blei sett så låg at han «vesentleg dekte
arbeidslønna». Dette er reine påstandar, Lunden viser
ikkje til prisar og lønsnivå. Han ser suverent bort frå
det eg skreiv om tømmerprisane (NØH 165 ff.). 6) Lunden hevda
at ved skogsdrift kunne bøndene «rekne arbeidsverdien ...
nær null ved alternativ sysselsetting». Kor mange dagsverk
vil då 3 rd. for ei tylvt målstømmer svare til kring
1750 (NØH 165)? Tar eg godt i og set dagløna til ei ort,
svarar prisen til 12 dagsverk. Jamvel ein som ikkje har greie på
skogbruk vil nok ane at det skal lang køyring til før det
går med eit dagsverk før stokken ligg på elvebarden.
For tømmeret frå sjølve dalen kan nettoen (rotverdet,
skogverdet) ha vore mellom 2/3 og 3/4 av prisen. Her hadde i alle fall
bøndene ikkje mista kapitalverdet av skogen.
Men kva så med den skogen som låg lenger
borte? Vel, her er grunnen til at borgarane ikkje kunne makte å drive
prisen ned til berre dekkjing av arbeidsløn. Lunden må meine
at produksjonskostnadene var like, noko som ikkje var eller er tilfelle.
Eit kjøparmonopol måtte setje tømmerprisen så
høgt at han dekte arbeidskostnaden ved drifta frå den skogen
som låg vanskelegast til. Her var det ingen kapitalverdi, men over
alt elles ville skogeigaren kunne rekne med ein netto. For å auke
tømmerleveransen måtte monopolet setje opp prisen så
grensa for lønsam drift blei flytta. Det førde automatisk
til auka kapitalverde for skogen som låg innanfor denne grensa.
Lunden kunne ha vurdert korleis det eg skreiv om
tømmerprisar og monopolisering høvde med hans påstand
om at bøndene ikkje hadde (eller mista) kapitalverde av skogen.
Han kunne og ha sett på det dømet eg nemner (NØH 166),
der Halvor Lauvrak skulle levere 750 kbm. i ein sesong. Der er betalinga
(600 rd.) til og med omrekna til kuverde, eit omgrep Lunden kjenner og
nytter. Og dette var i eit vassdrag som verkeleg var monopolisert, ein
kjøpar dominerte fullstendig.(7)
Påstanden om kapitalverdet som ikkje fanst
har Lunden bruk for til å forklare at kapitalverdet som eit «bønder
frå slutten av 1600-talet også i nokon mon fekk lov til å
overta skogsjord», som ein del av overgangen til sjølveige.
Forklaringa held ikkje, men kva med det han skriv om overgangen i
dei meir reine jordbruksbygdene? (KL 105). Her er det og tale om kapitalverdet
som eit «generalforhold». Han resonnerer retrospektivt: «Det
er ei kjend sak at kapitalverdien i moderne norsk jordbruk helst har vore
null, eller negativ». 7) Ei kjend sak? For mellomkrigstida syner
driftsgranskingane berre negativ forrenting i året 1921/22 og null
i 1926/27.(5)
Likevel, om enn Lunden ikkje kjenner til forretninga
i det moderne jordbruket, så kan han ha rett når det gjeld
stoda under overgangen til sjølveige. Korleis kan ein etterprøve
denne hypotesen? Fyrst vil eg peike på årsaksforklaringa hans,
«denøkonomiske veikskapen til norsk jordbruk, i konkurranse
m.a. med framande produsentar». 8) Kva slag tevling utanfrå?
Her skriv han om perioden 1660-1850. Den einaste nemnande tevlinga kom
frå danske kornprodusentar. Denne var negativ berre for dei få
bøndene i kystbygdene som hadde korn å selje. Dette går
ikkje som ei ålmenn forklaring for norsk jordbruk.(9)
Så til kapitalverdet som ikkje fanst. Lunden
meiner at bondens innsats berre gav han ei normal arbeidsløn, det
blei ikkje noko overskot til rente på kapitalen. Jordbruksjorda var
«ein ressurs av nærmast konstant storleik», folketalsauken
førde til kamp om jorda. 9) I så fall må det fylgje
at arbeidets grenseproduktivitet var null eller negativ, å setje
inn leigd arbeidskraft ville føre med seg økonomisk tap.
Ingen vil vel hevde at Sunnfjord skilde seg ut ved høg arbeidsproduktivitet.
Men 1745 klaga bøndene i Vik, ei rein jordbruksbygd, over skort
på tenestefolk. Dei rekna opp 52 ungdomar som hadde tatt teneste
i andre bygder (Vik hadde eit folketal på omlag 600).(10) Ei rimeleg
forklaring er at grenseproduktiviteten var positiv, endå meir må
det vere tilfelle for gjennomsnittsproduktiviteten. Garden gav eit overskot
til dekking av kapitalrente.
Eit anna resonnement fører til liknande resultat.
Mykje av gardkjøpa blei
finansiert ved lån, tildels ved at seljaren let ein del av summen
bli ståande mot pantobligasjon.(11) Korleis makta dei å betale
rente, når garden ikkje gav overskot ut over ei vanleg dagløn?
(Då måtte i tilfelle dagleigarar og tenestefolk ha hatt høgare
levestandard enn bøndene, ingen meiner vel det.) Ikkje nok med renta,
men mange greidde dertil å betale ned lånet, noko som kravde
eit endå større overskot i drifta. Vi kan sjå på
stoda ved 1850. Då er det rekna med at pantegjelda i landbruket var
omlag 50 mill.spd. Berre renta var 2 1/2 mill.spd., i tillegg kom avdraga.
Verdet av jordbruksproduksjonen var omlag 20 mill.spd., 1/8 av dette gjekk
til rentebetaling.(12)
Lundens «konsistente teori» har ført
han på ville vegar når det gjeld skognæringane, forholdet
mellom bonde og borgar, og overgangen til sjølveige. Eg skal så
kommentere litt det han skriv under fyrste hovudpunkt - skatteleggjinga.
Lunden hevder for det fyrste at bøndene i Noreg var hardt skattlagde
i denne perioden, framfor alt etter 1650. Granskinga hans tyder på
at det må «brenne eit blått lys for teorien om at bøndene
ytte stort mindre enn dei makta.» (KL 102). For det andre hevdar
han at dei norske bøndene og Noreg i det heile blei hardare skattlagt
enn Danmark og dei danske bøndene. (I alle fall argumenterer han
sterkt mot det synet som blir hevda i NØH.) Når det gjeld
skatt og skatte evne i Noreg kjem han med «to stikkprøver»,
frå Nord Gudbrandsdal i 1650 åra og Sunnfjord kring 1780.(13)
Til det fyrste er å seie at her har han valt ut dei år i perioden
som hadde hardast skattleggjing, m.a. var det krigsår. (Og det er
før «forskjellsbehandlinga» verkeleg viste seg, sjå
NØH 80). Men kva med Sunnfjord? Lunden har berre ei «litterær»
kjelde, sorenskriver Arentz sitt verk om Sunnfjord. 10) Dette er ikkje
noko føredøme for «slik gransking som også
må gjerast». Lunden stoler heilt og fullt på embetsmannens
ord, utan å vurdere om det kunne liggje ein tendens i verket. Arentz
omtaler «det lidet bohave» som sunnfjordingen sat med. Dette
kan ein i alle fall granske, ved hjelp av skifteprotokollane. Det spørst
om ikkje den gode skrivaren har skildra stoda mørkare enn ho var.
Eit døme: 1758 var det skifte etter Lundens sambygding Knut Nilsson
«Qvarmø»(?). Jorda hans blei taksert til 50 rd., men
aktiva kom opp i 354 rd., og gjeldfri var han. Det blei registrert 177
rd. kontant, her var det i alle fall ingen vanske med å betale skatten.(14)
Attende til Arentz. Kvifor skriv han «nuomstunder» har bonden
berre «det lidet bohave» å stole på? Meiner han
ikkje her at stoda var betre noko tidlegare? Det kan gå på
at vårsilda blei borte kring 1760, noko som førde til mindre
innkomer for sunnfjordingane. Skatteevna må ha blitt mindre.
For landet under eitt vil eg seie fylgjande: Eg
har granska skifteprotokollar frå dei fleste landslutene før
1807, i ulike samanhengar. Den må vere tolleg blind som ut frå
desse kjeldene vil hevde at bøndene ikkje makta å betale meir
skatt.
Så til jamføringa mellom Noreg og Danmark.
Lunden kjem med to «hovudpunkt» (delvis lånt frå
Erling Reksten) som argument for at skatteevna var større i Danmark.
For det fyrste var Danmark meir urbanisert, «eit heilt vesentleg
moment» (KL 99). «Byøkonomien hadde radikalt større
evne til å betale meir skatt, særskilt pengeskatt». 11
) Å dra inn betalingsformen i denne samanhengen er heilt irrelevant.
Lunden meiner vel at realinnkomene var «radikalt større»
i byane. Men var dei det? Kva med den store underklassen i byane?
Det andre argumentet går på bygdene.
Jorda i Danmark var «vesentleg meir naturleg produktiv» enn
i Noreg, dette var «avgjerande for kunstgjødsla». 12)
Nei, det avgjerande var då tilgangen på naturgjødsel.
Det var minimumsfaktoren i Danmark, noko som låg bak trivangsbruket
der. Arealproduktiviteten var heller større i Noreg, endå
om vi berre jamfører med det danske arealet som blei tilsådd.
Vidare hadde Danmark «3.3 gpnger så
stort dyrkbart areal som Norge». 13) Her byggjer han på Erling
Reksten (som igjen byggjer på Axel Sømme.)(15) Tala gjeld
ikkje «dyrkbart» areal, men dyrka. (Dyrkande jord har Danmark
ikkje meir enn dobbelt så mykje som Noreg.) Reksten og Lunden fører
forholdstalet frå 1960 300 år bakover i tid, dristig bruk av
retrospektiv metode. Dertil gløymer dei å ta omsyn til at
1/3 av det danske åkerarealet lag brakk. Forholdstalet blei då
berre 2.2.
Det er klart at tilsådd areal og kornproduksjon
var høgare i Danmark, truleg omlag det doble. Men det åleine
kan vi ikkje sjå som uttrykk for ulike skatteevne i dansk og norsk
landbruk. (14) For det fyrste spela husdyrbruket ei større rolle
her i landet. For det andre og viktigaste alle dei andre syslene
som norske bønder fekk innkomer frå. (16) Og endeleg: Lunden
skriv her om bøndene. Det er rimeleg å tenke seg at den danske
festebonden hadde større jordavgifter enn det dei norske bøndene
måtte ut med i landskyld og gjeldsrente til grupper utanfor bondesamfunnet.(17)
Lunden rekner med toll som ei form for skatt, det
gjev auka skattesum og ulik tyngd på Noreg og Danmark. 15) For Noreg
må det ikkje vere ein «skatt» på bøndene,
men eksportørane (KL 98). (Lunden hevder jo at bøndene berre
fekk arbeidsinnkome frå skogbruket, og trelasttollen var den dominerande).
Ut gjennom 1700 talet auka dei danske tollinnkomene, 1785/88 låg
dei 25 % over dei norske.(18) Pro pers. blei det meir enn i Noreg,
folketalet var omlag 5 % høgare. Tar vi med konsumsjonen blei skilnaden
mykje større, 1 330 000 mot 640 000 rd.
Prinsipielt er det ikkje rett å ta med toll
i dette reknestykket. 16) Intensjonen bak tollsatsane var ikkje ei skattleggjing
av nordmenn (eller danskar). I røynda kan vi heller ikkje seie at
«dei norske tømmerseljarane» betalte. Lunden hevdar,
heilt rett, at det ville vere «eit noko primitivt økonomisk
resonnement» å peike på at utlendingane konkret betalte
tollpengane. Men det han skriv er like «primitivt» . I praksis
ville det bli ei deling, ingen av partane i handelen ville greie å
skuve heile kostnaden (tollen) over på den andre.
Så til sjølve jamføringa. 17)
1785/88 var skatten pro pers. i Danmark omlag 4 gonger så høg
som i Noreg.(19) Vil nokon hevde at det same forholdet galdt for
bruttonasjonalproduktet? Det siste er avgjerande når vi skal
jamføre skattenivå og skatteevne i dei to landa (områda).
Dette skulle vere eit klart nok resultat. Verre
blir det å seie noko om bøndene i dei to landa. I 1780-åra
kunne det falle omlag 10 rd. på kvar dansk bonde i matrikkelskatt,
mot vel 3 rd. på den norske. I tillegg måtte dansken ut med
1 rd. årleg for dei i huslyden som var over 17 år. Dansken
måtte såleis ut med minst 4 gonger så mykje som nordmannen.
Det som blir skrive om danske bønder pa 1700 talet tyder ikkje på
at skatteevna var markert høgare hos han enn hos nordmannen.(20)
Vel med tanke på eit slikt resultat har Lunden
eit «siste våpen». Om norske bønder betalte relativt
mindre skatt «hadde ein ikkje vist at dei ... blei mindre utnytta
av den tids «establishment» enn dei danske» (KL 106 f.)
18) Norske bønder var offer for «den nye, kapitalistiske utnyttingstypen
gjennom marknaden», og det kanhende meir enn dei danske. - Dette
er for så vidt kjende tonar, (21) men eg har ikkje sett at
ein seriøs historikar har granska emnet, langt mindre freista å
måle «utnyttinga». Sett at ein fiskarbonde frå
ytre Sunnfjord betaler 2 rd. i skatt ein dansk festebonde med same inntekt
betaler 8 rd. Med 7 rd. «kapitalistisk utnytting» ville sunnfjordingen
kome dårlegare ut. Men kor mykje fisk svarer det til?
Lunden argumenterer for at danskane skattla Noreg
så hardt at dei tok «det meste av det overskotet som var»
(KL 97). (Kva slag «overskot» meiner han?) Men i tillegg har
han eit «øydeleggande argument» mot «favoriseringa»
av Noreg, som verkeleg viser «kolonibehandling» - overføringane
av statsinnkomer til Danmark. (98) Lunden kritiserer meg for ikkje å
ha tatt opp emnet, og ender opp med å insinuere at eg meiner det
ikkje går å seie noko om verknadene av overføringane.
Sjølvsagt går det, men som eit element i dansk økonomisk
historie. For norsk historie er det ei ufruktbar problemstilling.
Eg vil likevel kome med eit par kommentarar. 19)
Lunden har nokre heller merkelege formulermgar om «ei overbalansering
av det særnorske statsbudsjettet på ca. 300 % o.l. Han freister
å bruke keynesianisme (22) for å peike på dei økonomiske
verknadene for Noreg og Danmark av overføringa. Men keynesiamsmen
har her noko med konjunkturpolitikk å gjere, om det finst ledige
produksjonsfaktorar o.s.b.
Det er rimeleg å rekne med at overføringane
hadde ein viss positiv effekt for dansk økonomi. Men kor stor? Vi
kan i alle fall avgrense effekten geografisk. I det store og heile blei
innkomene nytta i København-området (om dei blei nytta i Danmark
i det heile). 20) Men her er vi ved eit poeng som er elementært for
den som kjenner heilstatspolltikken. Hovudstaden var favorisert, både
med og utan intensjonar. Byane i dei danske provinsane og i hertugdøma
kunne ha vel så god grunn til å tale om «kolonibehandling».
Og frå begge områda skjedde det overføring av statsinnkomer
til hovudstaden.
Det er sers komplisert å greie ut effekten
for hovudstad og omland. Kor stor var investeringsraten? Kor mykje av overføringane
gjekk til utanlandske forbruksvarer? Kor mykje gjekk til import av norske
varer?
Her er eit anna poeng. Lunden ser Danmarks vinst
som Noregs tap. Vi kan heller sjå overføringane som betaling
for tenester, ikkje som ei «tapping» av ressursar. Noreg oppnådde
«stordriftsfordelar», noko som begge partar kunne på.
Lunden opererer kontrafaktisk med at Kristiania
kunne ha vore hovudstad i dobbelmonarkiet. 21) Kva så? Vil han finne
fram til det Noreg «tapte» ved dette tankeeksperimentet? Det
blir ille nok med hans omtale av at Kristiania blei hovudstad. Han nytter
dette som «fullt mogleg» årsak til fallet i mortaliteten
etter 1814 (KL 98). Dette er korkje mogeleg eller «sannsynleg».
Mortalitetsfallet var ålment over heile landet, og det ovra seg på
Agder og Vestlandet lenge før 1814.(23)
Til slutt eit par merknader knytt til dei siste setningane i NØH.
Lunden påpeiker at utsegna om «jamn inntektsfordeling»
ikkje byggjer på gransking. Derimot kjem han sjølv med «eit
døme på slik gransking», som sjølvsagt skal vise
stor ulikskap i inntekta. Han har inntekta for ein prest i Gudbrandsdal,
eiga for ein annan. (KL 102 f.). I seg sjølv seier ikkje dette noko
som helst om inntektsfordelinga. Det ligg likevel implisitt, rike prestar
mot fattige bønder. 22) Det skulle ikkje vere vanskeleg å
finne skifte etter prestar som åtte langt mindre enn Glastrop i Våga.
Men kva med rike bønder? Glastrop hadde ein brutto på 2262
og netto på 941 rd. 1782 var det skifte etter vendølen Ola
Knutson Skjervedal (1 hest, 12 storfe, 37 småfe). Han hadde aktiva
for 2700 rd. og var gjeldfri.(24) Av garden skatta han 1 rd. årleg.
Heilt jamn inntektsfordeling er det uråd å
finne, det er sjølvsagt. Av samanhengen burde det gå fram
at det her var tale om ei jamføring med andre land på den
tid. Det tykkjest ikkje vere nokon urimeleg hypotese, for den som kjenner
litt til andre land i Europa i perioden. Den granskinga Lee Soltow gjorde
av jordavgifta 1802 skulle underbyggje hypotesen.(25) Same mannen hadde
nett kome med ein artikkel om formuesfordelinga i Danmark, med grunnlag
i skatten 1789. Der var det ekstrem ulikskap. Den rikaste prosenten av
eigarane sat med 56 % av kapitalen.(56)
Endeleg vil eg nemne at Lunden ironiserer over siste
setninga mi: «Om Tveite ville få alle sunnfjordingar eller
gudbrandsdølar til å skrive under på at dette var «eit
godt samfunn å tilhøyre», er vel ikkje så sikkert».
(KL 103). Her har han kutta ut tri ord som gjekk føre: «for
den tid» (uth.her).
Stein Tveite
Notar:
1 . Lunden s. 107 f. Eg viser seinare i tekst til KL, og
den boka han omtaler med NØH.
2. Sjølvsagt vil eg ha same innvendinga mot andre skjema av
same type, som t.d. hos Sombart.
3. Tal i parentes seinare nummererer dei spesifikke motlegga eg har.
4. F. E Eliassen, «Sagbruksprivilegia av 1688 i Follo fogderi»,
Follominne 1975 s. 59 73.
5. Eliassen, op.cit. A. Dybdahl, Jordeiendomsforhold og godseiere i
Trøndelag, (Trondheim 1979) s. 101.
6. A. Holmsen Fra Linderud eil Eidsvold Værk, I (Oslo 1946).
7. N. Wergeland, Christiansands Beskrivelse (Kr.sand 1963)
8. Sjå t.d. Statistiske oversikter 1948, s. 85. Kanhende
vil Lunden peike på åra før 1914 som det «moderne
jordbruket». Men det ser ut til at i 1870 åra gav garden sers
god forrenting i storparten av landet. (S. Tveite, «Overfolking»,
«»befolkningspress og vandring», Vandringer. Festskrift
til Ingrid Semmingsen (Oslo 1980) s. 47 ff.
9. Han nemner og tevlinga mellom «uorganiserte norske produsentar»
(KL 105). Det er uklårt om han meiner tevling på varemarknaden
eller tevling om jord.
10. S. Tveite, «Arbeidskraft og økonomisk framgang i Norge
på 1700-talet», Beretning. Det nordiske historikermøde
i København 1971, s. 137.
11. A. Holmsen, Gard-bygd-rike (Oslo 1966) s. 227 f.
12. O. Klokk,Oversigt over det norske landbruks utvikling siden 1750
(Kra. 1920) s.65; M. B. Tvethe, Norges Statistik (Chr. 1848) s. 50, 55.
13. Oppgåvene frå Gudbrandsdal har Lunden nytta tidlegare
til same føremålet, å vise «ei årleg tapping
og kolonibehandling som det berre er vanskeleg å skjøne var
økonomisk mogeleg». (Ottar Brox (red), Norsk landbruk - utvikling
eller avvikling.) Då galdt det EF.
14. Sk.prot. B I Sunnfjord fol. 182.
15. Heimen, 1979, s. 176.
16. Derimot har Reksten med dette momentet.
17. Renter og landskyld bønder imellom kan vi sjå bort
frå i denne samanhengen.
18. H.C Johansen, Dansk økonomisk politik i årene efter
1784 (Århus 1968) s. 342 f.
19. Sst.
20. D.s., En samfundsorgantsation i opbrud 1700-1870 (Kbh. 1979) s.
192 224. 2
1. Men meiner han ikkje her «utbyting»? Jfr. J. Bjørgum
i HT, 1980, s. 124.
22. Dette i motsetnad til «medlemmene av Bergensskulen»
som «bruker å anbefale klassisk økonomikk». -
Kven og kva er denne «Bergensskulen» Lunden omtaler støtt
og stendig? Kven er det (utan S.Tv.) som har anbefalt klassisk økonomikk?
23. M. Drake, Population and Society in Norway 1735-1865 (London 1969)
s.46 ff.
24. S. Tveite, Vennesla, I (Kr.sand 1956) s. 879 og 889 f.
25. HT 197. 2
6. SEHR 1980 s.120-138.
10.08.1999 Tilrettelagt av Frode
Ulvund |